"Gising, gumising ka anak ko!"
Iminulat ni Dianne ang kanyang mga mata. Bahagya niyang kinusot ito at nilinga ang kwarto, saka bumuntong hininga. Salamat at nakabalik na siya. Niyakap niya ang kanyang ina at tila ba gusto niyang maiyak.
"Ang panaginip na naman bang iyon, iha?"
Tumango lang siya.
"Huwag mo nang isipin masyado iyan. Tara dito at may ipapakita ako sa iyo."
Hinawi ni Dianne ang kurtina at nakita niya ang maraming tao sa ibaba. Nandoon ang kanyang Daddy at abala sa pagmamando sa mga tao kung saan ilalagay ang mga lamesa at upuan. Kinawayan siya nito at gumanti rin ito ng kaway. Siguro nga ay hindi na niya dapat pang pansinin ang napanaginipan at intindihin na lang niya ang nangyayari ngayon. Bukas ang kanyang birthday kaya dapat ngayon pa lang ay masaya na siya. Ngumiti si Dianne at sinimulan na ang kanyang regular na araw dito sa buhay niyang ito.
